اولا انا كنت هناك فكل كلمه مسؤول عنها والناس اللي هناك صحابي اللي لسه عايشين و اللي توفوا وربي شهيد علي كلامي و كله للامانه فقط لا غير .( اعذروني علي غلطاتي الاملائيه او اذا نسيت اكتب معلومه ولكني اكتب هذا توضيحا للامور )
ابدا كلامي بقذاره الاعلام وتحريفه للوقائع و تحويل مأساة اصحابنا الي توجهات سياسيه ليس لنا علاقه بيها من قريب او بعيد او تحويلها لمصالح شخصيه.
١- المجموعه كانت مكونه من ١١ شخص ٣ رجعوا و مكملوش و اللي كمل ٨ ، سابو عدة السفر ( سليبينج باج و جواكت.. ) في الاستراحه
٢- الجو لما طلعوا كان طبيعي ( ماعتقدش انه في حد مضحي بحياته والكلام موجه للناس اللي بتقول ايه اللي وداهم هناك )
٣- وهما علي الجبل وفي خلال ١٥ دقيقه حصلت العاصفه التلجيه ( لاول مره ) وغطت الجبل بالتلج وغيوم ورعد وامطار ووصلت درجه الحراره ( بناء علي كلام احد الادله البدو ) ناقص ٣٠ وبسبب الجو والغيوم تاه الدليل وتاهوا صحابنا
٤- في ظل الظروف دية في ناس ماقدرتش تستحمل الجو وبدات تتعب وفي اللي اغمي عليهم وما بقوش قادرين يتحركوا
٥- بعد توهان لمدة ١١ ساعه في الجبل طلع ادله تانين محاولين انقاذهم و تم ذالك لاربع اشخاص وتم تسليمهم في احد المناطق الجبليه بوعود للرجوع لانقاذ الاربع الاخرين احياء ام اموات ما قدرش احكم لان اصحابنا لسه مافقوش عشان يحكولنا بالتفاصيل
٦- علمنا من الداخليه والجيش و البدو انه في عناصر من الجيش و الشرطه والبدو طلعوا الجبل بحثا عنهم ولكن بسبب انعدام الاتصالات و سوء الظروف الجويه كان انقاذهم في نفس اليوم صعب علما بوصول طائره لهم علي الخامسه عصرا وتحركت من مطار سانت كاترين في الظلام ( وكلام ثقه من احد الطيارين انه عمليه الانقاذ ليلا صعبه في هذه التضاريس ) وصلوا المكان ولكن للاسف الطيار مكانش معاه معلومات عن اللي حيتم انقاذهم بحيث كان في ناس كتير عاوزه تنزل مع الاربع مصابين بسبب الظروف فعاد ادراجه للمطار ( سوء تواصل مابين الاجهزه وانعدام الخبره )
٧- تاني يوم الساعه ٥ فجرا كنت انا واصدقائي امام مطار سانت كاترين ، الطيار بدأ يجهز طيارته عشان يتحرك حوالي الساعه ٧ صباحا، مع العلم انه اخد معاه مؤونه للعساكر عشان يرجعوا سيرا للكتيبه، بعد اقلاع الطياره وصلتلنا معلومات انهم حيكونوا في مدينه ابو رديس يزود الطياره بالنزين ويطلع يجيب باقي الاشخاص و كلهم ينزلوا علي علي مطار سانت كاترين ، و بعد ما يقارب ٤٥ - ٦٠ دقيقه لقينا الطياره نزلت مطار سانت كاترين ومعاهم اربع اشخاص سلمهم للاسعاف وكانوا بصحه جيده جسديا و طار يزود بنزين في المطار بتاع ابو رديس .
٨-طبعا هنا بدات جميع انواع الاشاعات تطلع عن وفاه الاربع اشخاص و في اللي قال انه واحد عايش وتلاته متوفين مع العلم اننا عارفين انه رمضان كان تايه من يوم الاتنين وبلغنا بالكلام ده ( وهنا بدا شغل الاعلام القذر من تحريف للوقائع و نسب كلام علي لسان زي اشاعه ان في ٣ سائحين اجانب معانا وتم انقاذهم ، ان تامر صاحبنا قال انه كلم الجيش وهوا في الحقيقه مقالش هوا كلم مين ،،، وخد من اعلامنا كتير )
٩- اليوم عدي للساعه خمس بليل من غير مايتم انتشال الاربع اشخاص كل اللي حصل اننا سمعنا ان في طياره طلعت من بني سويف مجهزه للنوع ده من العمليات و ان في مافيش اوامر اخدها طيار الطياره الاولي انه يرجع للاربع اشخاص وعلي هذا الكلام فضلنا في جدل وانهيار عصبي وحصل لخاله احدي الاربع اشخاص وتعب نفسي مش طبيعي لان اخواتنا فوق ومش عارفين عايشين ولا مايتين وكنا شبه مدمرين نفسيا ورفضنا تمام التحدث مع احد القنوات او الميديا اللي كانت امام المطار في الوقت ده بعد كميه الكذب والتحريف اللي بنسمعها
١٠- اخر الاخبار قبل ماتحرك علي ( ١١ مساء ) للقاهره ان النهارده حيتم انتشال الجثث بعد ماتم التاكد بسبب الفيديو اللي كلنا شوفناه
١١- عرفنا صباحا من احد البدو انهم لقوا محمد رمضان متوفي وماحبتش اتكلم او ابلغ الا لما اتاكد وتم التاكد ونشرت الخبر
* انا كلامي عن وجودي هناك من يوم الاتنين مساء الي الثلاثاء منتصف الليل ومتابع اصحابي اللي هناك علي التلفون اول باول من يوم الاتنين الصبح
* ياليت نبطل تحويل محنة وماساة صحابنا لتوجهات سياسيه و مصالح الشخصيه وبهارات اعلاميه ليس لها دليل من الصحه.
* اشكر الناس اللي وقفت معانا من اهل البدو و الطيار اللي انقذ اصحابنا وليس تهكما و مزايده ولكن كل من كان له تاثير ايجابي علي العمليه فله جزيل الشكر و اما من كان يريد اخلاء مسؤوليته واعفاء نفسه فحسبي الله ونعم الوكيل فيه.( لا تحديد او رمي اتهامات )
وارجوكم لاتنسوا اصحابنا الاحياء والاموات من الدعاء وماننساش انهم محتاجين كل دعواتنا دلوقتي وبلاش اسلوب الشتايم و القيل و القال في ظروف مخلينا احنا صحابهم مدمرين نفسيا .
اللي ربنا احياهم :
يسرا ، ايهاب ، مها و فاروق
المتوفيين :
هاجر، احمد عبدالعظيم ، خالد السباعي و محمد رمضان . ربي اسكنهم فسيح جناتك وارزق اهلهم الصبر والسلوان و ارزقهم بدار خير من دار الدنيا و اشهد ان لا الله الا الله و ان محمد رسول الله .
اسلام جوهر
ليست هناك تعليقات:
إرسال تعليق